dimanche, août 14L'information d'un bout à l'autre

Frape tanbou, jwe gita ak bandjo pou lang ak kilti ayisyen ki janbe fwontyè

(À l’occasion de la célébration de la Journée internationale de la langue créole, le Journal la Diaspora publie des textes en créole pour mieux vous faire apprécier ce beau patrimoine)

Ane sa a, Akademi Kreyòl Ayisyen (AKA) selebre mwa lang ak kilti la anba tèm “Lang Kreyòl tout kote, sans fòskote”. Yon tèm ki pral pèmèt nou founi je gade kantite jefò divès ayisyen ki nan peyi lòtbòdlo ap ap fè pou bay lang kreyòl ak kilti ayisyen an jarèt. Ayibobo pou yo !

Alòs, dènye chif yo fè konnen gen anviwon 19 milyon moun sou latè beni ki ap pale kreyòl. Sa ki ta vle di se pa ayisyen selman ki pale lang sa a. Men, san nou pa fè erè, ayisyen patisipe anpil nan ede lang la travèse fwontyè. Anpil ayisyen, depi lè yo ap kite peyi a, yo tou pote anba po yo ni lang kreyòl la ni kilti peyi a. Sòti janvye pou rive oktòb 2021 an, se pa youn ou de ayisyen ki poze gwo aksyon pou pèmèt flanbo kilti ayisyen rete tou limen.

Nan peyi Etazini, gen yon ayisyèn, Anne Shermane Gracius Cadet, li se espesyalis nan zafè kizin, li te di nou se avèk plezi pou l te ajoute pate kòde ayisyen nan resèt kizin li yo. Selon sa li te fè konnen, se yon fason pou l te fè non selman tout ayisyen rete konekte ak kilti yo. Men tou, fè etranje yo goute yon pati nan kizin lakay nou.

Nan kòmansman mwa me ki sot pase la gen yon gwoup jèn ayisyen nan peyi Meksik ki te lanse yon gwoup konpa. Premye rezon yo te avanse pou te jistifye chwa sa a, yo te fè konnen se paske yo menm tou yo vle pote touch pa yo nan ede zèv Nemou Jan Batis la layite kòl’ nan peyi lòt bò dlo.

Alòske, Nan menm mwa me sa a, nan lòt riv kontinan meriken an, kidonk amerik disid, yon lòt gwoup jèn inivèsitè te degaje yo kou mèt jan jak nan konvenk leta Ajanten dekwa pou Kreyòl te ka anseye nan peyi sa a. chòz di, chòz fèt. Ane ki ap vini la, ajanten ak ajantin pral aprann pale kreyòl nou. Nan moman n’ap pale a la gen gwo rasanbleman, konferans deba ap fèt sou lang ak kilti kreyòl la nan peyi Ajantin sa a. Frape tanbou pou kreyòl la!

Sòti 22 pou rive 24 oktòb, yon gwo aktivite te òganize nan lakou Lafrans ki te gen pou non, Kreyolo-foli. Se te nan lide pou kreye yon kontak ant kominote ayisyen nan zòn sa a ak lang kreyòl. Nan konferans sa a, entèvenan yo te reyisi kreye yon rapò ant lang Kreyol ak revolisyon.

Tout sa yo pou montre kijan chak ayisyen, nenpot kote yo ye, toujou montre gwo fyète yo genyen pou idantifye tet yo ak lang kreyòl la epi kilti ayisyen anplis. Tankou jan nou konnenl l’an, lang sa a mache kòt a kòt ak revolisyon. Si nou pran tan pou n mete plis lòd nan lang lan, kreye plis aktivite ladan l tankou ekri, pale, edike an gwo pwodwi ladan l, se sèten gen plis rezilta ki te ka bay. 

Junior Luc

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *